Hettusótt í hokkíinu

Það er óhætt að tala um hettusóttarfaraldur í NHL-hokkídeildinni þar sem fimmtán leikmenn hafa þegar lagst í rúmið vegna veikinnar.

Fyrst veiktust þrír leikmenn Anaheim Ducks og síðan hafa leikmenn í fjórum öðrum liðum veikst. Hettusótt er bráðsmitandi og berst smit með úða úr öndunarfærum. Til að mynda með hnerra.

Besti leikmaður deildarinnar, Sidney Crosby, leikmaður Pittsburgh, er á meðal þeirra sem hafa veikst.

Þetta mál er afar áhugavert enda leggst þessi veiki oftar á börn en fullorðna. Hún getur valdið alvarlegum fylgikvillum hjá fullorðnum.

Alvarlegir fylgikvillar geta verið, heilabólga, heyrnarskerðing, bólga í brjóstum, briskirtli, eggjastokkum eða eistum. Bólga í síðast töldu líffærunum getur valdið ófrjósemi segir á heimasíðu landslæknis.