Tvisvar rekinn úr starfinu en sagði nú sjálfur upp

Victor Piturcas er óvænt hættur með landsliðsþjálfari Rúmena en rúmenska landsliðið hefur byrjað undankeppni EM 2016 vel og er með sjö stig af níu mögulegum eftir þrjá leiki.

Piturcas var að þjálfa rúmenska liðið í þriðja sinn og hafði tvisvar verið rekinn úr starfinu, fyrst 1999 þrátt fyrir að hafa komið liðinu á EM en svo aftur árið 2008 eftir að liðið komst ekki upp úr sínum riðli á EM í Sviss og Austurríki.

Victor Piturcas var ráðinn í þriðja sinn í júní 2011 og hafði stýrt landsliðnu síðan þá. Síðasti leikurinn var hans 98. með liðið en hann mun ekki vera við stjórnvölinn þegar Rúmenar taka á móti Norður-Írum í nóvember í toppslag riðilsins.

Rúmenía hefur unnið 1-0 sigur á Grikklandi á útivelli, gert 1-1 jafntefli við Ungverjaland á heimavelli og unnið 2-0 sigur á Finnlandi á útivelli í fyrstu þremur leikjum sínum í undankeppninni. Norður-Írar er efstir með fullt hús en Rúmenía er í 2. sæti.

Hinn 58 ára gamli Piturcas var með samning til ársins 2016 en sagði nú upp til að taka við liði Al Ittihad í Sádí-Arabíu. Hann hefur átta sinnum gert lið að meisturum í landinu síðast árið 2009.

Nokkrir hafa verið nefndir sem mögulegur eftirmaður Victor Piturcas en það eru menn eins og þeir Ladislau Bölöni (102 landsleikir, landsliðsþjálfari 2000-2001), Dan Petrescu (95 landsleikir), Cosmin Contra (73 landsleikir og nú þjálfari Getafe) og Cosmin Olaroiu (fyrrum þjálfari Steaua Búkarest).