„Þetta er allt í vinnslu og fjárfestar bíða eftir okkur“

Hópur áhugamanna sem talað er um í þingsályktunartillögu Þorsteins Sæmundssonar, þingmanns Framsóknarflokksins, og nokkurra flokkssystkina hans er fyrirtækið Fertil ehf. Í þingsályktunartillögunni er vísað til þess að hópur áhugamanna hafi ráðist í frumáætlun um byggingu verksmiðju sem framleiða mundi 700 þúsund tonn af áburði og 700 þúsund tonn af kalsíumklóríði.



Þriggja manna hópur

Að félaginu standa þrír menn sem skipta með sér samtals 87 prósenta eignarhlut í félaginu, samkvæmt síðasta birta ársreikningi þess. Það eru bræðurnir Jón og Einar Hjartarsynir auk Eggerts Guðmundssonar byggingafræðings. Ekki er tilgreint í síðasta birta ársreikningi hver fer með eignarhald á því hlutafé sem eftir stendur en aðeins innlendir aðilar eru tilgreindir.



Jón segir í samtali við Vísi að fjárfestar séu tilbúnir og bíði eftir að gengið sé frá lausum endum. „Við erum að ganga frá öllum samningum við byrgja, söluaðila og þess háttar. Þetta er allt í vinnslu og fjárfestar bíða eftir okkur,“ segir hann.



Fjárfestingarþörfin hefur fjórfaldast

Árið 2009 áttu að verða til 150 bein störf, þar af 50 til 60 fyrir fólk með hátt menntunarstig en afleidd störf þrisvar til fjórum sinnum fleiri. Í dag er talað um að 150-200 störf verði til auk ótilgreinds fjölda afleiddra starfa. Jón segir töluna í tillögu Þorsteins ekki alveg rétta, kostnaðurinn sé aðeins lægri.



Morgunblaðið sagði frá áætlunum fyrirtækisins 2009 en þá hermdu heimildir blaðsins að fjárfestingin yrði ekki undir 30 milljörðum og raforkuþörfin 350 MW. Það er talsvert minna en þeir 120 milljarðar sem talað er um í þingsályktunartillögu Framsóknarflokksins.

Þorsteinn átti frumkvæðið

Hugmyndin var kynnt fyrir öllum þingmönnum suðurkjördæmis og fleiri aðilum. Jón og Eggert segja í kjölfarið hafi Þorsteinn haft samband og lagt til að hann myndi taka málið upp á þingi. „Þorsteinn hafði samband við okkur og spurðist fyrir um hvað við værum að gera. Hann sagði: „Mig langar að leggja þetta fram“. Þetta var samþykkt einróma af Framsóknarflokknum á sínum tíma,“ segir Jón.



Hafa ekki heyrt í Fertil í ár

Vísir greindi frá því í morgun að lítil spenna væri í sveitarfélögunum tveimur sem koma til greina að hýsa verksmiðjuna. Framkvæmdastjóri atvinnu- og hafnarsviðs Reykjanesbæjar segir að síðustu samskipti sem sveitarfélagið hafi átt við forsvarsmenn Fertil hafi verið á síðasta ári. 



Viljayfirlýsing hefur verið undirrituð á milli sveitarfélagsins og Fertil um að útvega lóð fyrir verksmiðjuna. Samkvæmt bæði Jóni og Eggerti hefur einnig verið skrifað undir viljayfirlýsingu við sveitarfélagið Ölfus um lóðir.