KA/Þór fær liðsstyrk fyrir veturinn

KA/Þór fékk í dag liðsstyrk fyrir veturinn í Olís-deild kvenna þegar Kriszta Szabó og Paula Chirli frá Rúmeníu skrifuðu undir hjá félaginu.

Kristzta og Paula hafa verið á reynslu undanfarna daga með liðinu og heilluðu forráðamenn KA/Þór á meðan reynslunni stóð.

Tóku þær meðal annars þátt í æfingarferð liðsins suður um síðustu helgi þar sem þær sýndu fína takta í æfingarleikjum.

Þær eru 22 og 23 ára gamlar en Kriszta er markvörður á meðan Paula er rétthent skytta sem getur einnig leikið sem miðjumaður. Gunnar Ernir Birgisson, þjálfari KA/Þór var gríðarlega ánægður með liðsstyrkinn.

„Þetta eru flottir leikmenn og koma til með að styrkja okkur á komandi leiktíð. Í fyrra var Sunnu Pétursdóttur hent í djúpu laugina í markinu og stóð hún sig vel en hún er aðeins 15 ára gömul og er því gott að hún fái reyndari markvörð með sér í vetur,“ sagði Gunnar um Krisztu.

„Paula er lunkinn leikmaður og getur leyst allar stöðurnar fyrir utan mjög vel. Þetta verður spennandi vetur og setjum við markið hátt,“ sagði Gunnar.