Sveiflukennd frammistaða veldur Rory áhyggjum

Opna breska meistaramótið í golfi hefst á Royal Liverpool-vellinum á morgun og mun norðurírski kylfingurinn Rory McIlroyræsa ásamt Hideki Matsuyama frá Japan og Jordan Spieth frá Bandaríkjunum klukkan hálf tíu.

Eins og svo margir aðrir kylfingar hitaði Rory upp fyrir mótið á opna skoska mótinu um síðustu helgi þar sem hann fór frábærlega af stað og setti vallarmet á fyrsta degi. Hann spilaði hringinn á Royal Aberdeen-vellinum á 64 höggum, sjö höggum undir pari.

Öfgarnar voru miklar í hans leik og hafa verið allt tímabilið. Daginn eftir lék hann á 78 höggum eða sex höggum yfir pari. Á Memorial mótinu fyrr á þessu ári byrjaði hann fyrsta hring á 63 höggum og fór annan á 78 höggum og svipaðir hlutir gerðust á öðru móti á PGA-mótaröðinni.

„Það er ekkert mál fyrir mig að eiga góðan hring á fimmtudegi þannig það ætti heldur ekki að vera neitt mál á föstudegi. Ég verð bara að láta eins og það sé fimmtudagur aftur,“ sagði McIlroy á blaðamannafundi í gær.

„Ég set mikla pressu á sjálfan mig að eiga jafngóðan hring á föstudegi ef ég hef byrjað vel á fimmtudegi. Ég verð bara að halda mér rólegum ef hlutirnir eru ekki alveg að ganga upp.“

Norður-Írinn hefur unnið tvö risamót á ferlinum, það síðasta fyrir tveimur árum síðan. Honum hefur gengið erfiðlega að bæta við öðru risatitli í safnið.

„Það virðist sem svo að ég lendi í því að spila illa á nokkrum holum á hverju einasta móti,“ segir Rory McIllroy.

Opna breska meistaramótið hefst á morgun og verða allir keppnisdagarnir fjórir í beinni útsendingu á Golfstöðinni.