Mörg áhugaverð holl á opna bandaríska

Búið er að raða í holl fyrir US Open sem hefst á morgun en golfáhugamenn eiga von á mikilli veislu næstu daga þar sem bestu kylfingar heims berjast um þennan sögufræga titil. Eins og alltaf eru mörg spennandi holl sem vert er að fylgjast sérstaklega með en til að mynda leikur Justin Rose sem sigraði mótið í fyrra með Phil Mickelson og hinum efnilega Matthew Fitzpatrick frá Englandi.

Norður-Írinn Rory McIlroy leikur með landa sínum Graeme McDowell og Webb Simpson en þeir hafa allir sigrað US Open áður. Adam Scott, besti kylfingur heims, spilar með Charl Schwartzel og núverandi Masters meistaranum Bubba Watson.

Spánverjinn vinsæli Miguel Angel Jimenez þarf að þola návist Englendingsins Ian Poulter fyrstu tvo dagana en með þeim í holli er hinn brosmildi brosmildi Thongchai Jaidee frá Tælandi. Þá verður örugglega gaman að fylgjast með þeim ungu Hideki Matsuyama, Rickie Fowler og Jordan Spieth tækla hinn gríðarlega langa og erfiða Pinehurst völl nr.2 en þeir eru paraðir saman.

US Open verður í beinni útsendingu á Golfstöðinni og hefst útsending frá fyrsta hring klukkan 17:00 á morgun.