Darri með 70 prósent þriggja stiga nýtingu í úrslitaeinvíginu

Darri Hilmarsson átti frábært úrslitaeinvígi með KR og var einn af lykilmönnunum á bak við það að KR tryggði sér Íslandsmeistaratitilinn í ár.

Darri spilaði að venju frábæra vörn og sinn öfluga liðsbolta en hann var einnig sjóðheitur fyrir utan þriggja stiga línuna.

Darri hitti meðal annars úr öllum þremur þriggja stiga skotum sínum í fjórða og síðasta leiknum þar af duttu tvær þeirra á lokakaflanum sem KR vann 19-8 og tryggði sér átta stiga sigur.  

Darri nýtti alls 12 af 17 þriggja stiga skotum sínum í einvíginu sem gerir ótrúlega 70,6 prósent þriggja stiga skotnýtingu. Darri setti niður 11 af 13 þriggja stiga skotum sínum í sigurleikjunum þremur.

Darri bætti með þessu met Marcus Walker frá því þegar KR vann titilinn fyrir þremur árum en enginn hefur hitt betur úr þriggja stiga skotum sínum í lokaúrslitunum frá árinu 1997.

Hér fyrir neðan má sjá lista yfir þá leikmenn sem hafa nýtt þriggja stiga skotin best í úrslitaeinvíginu frá 1997 til 2014.



Besta 3ja stiga skotnýting í lokaúrslitum (frá 1997)

- lágmark fimm þriggja stiga körfur

1. Darri Hilmarsson (KR 2014) - 70,6 prósent (12 af 17)

2. Marcus Walker (KR 2011) - 66,7 prósent (14 af 21)

3. Magnús Þór Gunnarsson (Keflavík 2005) - 66,7 prósent (8 af 12)

4. Guðjón Skúlason (Keflavík 1997) - 61,5 prósent (8 af 13)

5. Falur Harðarson (Keflavík 1997) - 57,6 prósent (19 af 33)

6. Ólafur Jón Ormsson (KR 2000) - 56,3 prósent (9 af 16)

7. Unndór Sigurðsson (Grindavík 1997) - 55,6 prósent (10 af 18)

8. J'Nathan Bullock (Grindavík 2012) - 53,8 prósent (7 af 13)

9. Jón Ólafur Jónsson (Snæfell 2010) - 52,9 prósent (9 af 17)

10. Nick Bradford (Grindavík 2009) - 52,2 prósent (12 af 23)