Átök fara harðnandi í Úkraínu

Þrír eru látnir og að minnsta kosti þrettán særðir eftir átök aðskilnaðarsinna og úkraínskra hermanna í hafnarborginni Mariupol í nótt. Fulltrúar Rússa og Úkraínumanna, auk Bandaríkjanna og Evrópusambandsins, hefja í dag viðræður í Sviss um málefni Úkraínu.

Arsen Avakov, innanríkisráðherra Úkraínu, sagði á Facebook-síðu sinni í morgun að um 300 aðskilnaðarsinnar hefðu gert árás á úkraínska herstöð í Mariupol í nótt og hermenn svarað með skothríð. Ásamt þeim látnu og særðu eru um 63 handteknir eftir átökin.

Aldrei hafa jafn margir látið eða særst í einstökum viðburði frá því að átökin í austanverðri Úkraínu hófust. Von er á liðsauka á svæðið á vegum úkraínskra yfirvalda. Mariupol er í Donetsk-héraði þar sem aðskilnaðarsinnar hafa undanfarið lagt undir sig opinberar byggingar og krafist atkvæðagreiðslu um sameiningu við Rússland.

Frásögn Avakov hefur ekki verið staðfest og halda rússneskir fjölmiðlar því fram að almennir borgarar hafi aðeins gefið sig á tal við úkraínska hermenn og þeir svarað með því að skjóta. John Kerry, utanríkisráðherra Bandaríkjanna, kom til Genfar í Sviss í gærkvöldi og hann mun í dag funda með utanríkismálaráðherra Evrópusambandsins og utanríkisráðherrum Rússlands og Úkraínu um stöðuna í Austur-Úkraínu. Vonast er til að fundurinn skili einhvers konar lausnum í deilunni eða dragi í það minnsta úr spennu svo hægt sé að leita sátta.

Úkraínsk yfirvöld kröfðust þess fyrir fundinn að Rússar myndu þegar láta af stuðningi við aðskilnaðarsinna í Austur-Úkraínu, en Rússar hafa neitað því staðfastlega að standa á bak við ólguna þar. Stjórnvöld í Kænugarði krefjast þess jafnframt að Rússar staðfesti að Krímskaginn tilheyri Úkraínu og kalli herlið sitt þaðan. Litlar líkur eru á að Rússar verði við þessu.

Fyrr í vikunni þegar Vladímír Pútin Rússlandsforseti var spurður hvort hann ætlaði að senda hermenn á átakasvæðin í Úkraínu sagði hann að þingið hefði veitt honum vald til þess en hann vonaðist til að þurfa ekki að beita því. Anders Fogh Rasmussen, framkvæmdastjóri Atlantshafsbandalagsins, sagði í gær að hann vonaðist enn eftir því að að rússnesk stjórnvöld lýstu því yfir að þau styddu ekki aðgerðir aðskilnaðarsinna í Úkraínu, en þjóðir bandalagsins hafa þegar sent aukinn herafla til austurhluta Evrópu.