Samningaviðræður milli ríkissáttarsemjara og Framhaldsskólakennara þokast áfram og er Ólafur Hjörtur Sigurjónsson, formaður Félags stjórnenda í framhaldsskólum, bjartsýnn á að samningar náist í þessari viku.
Verkfallið hefur nú staðið yfir í rúmar tvær vikur.
„Við höfum verið að fara yfir þau atriði sem enn standa útaf borðinu,“ segir Ólafur.
„Við gerum ráð fyrir því að vera hér fram á kvöld. Þetta er ekki að leysast alveg strax en við vonum að samningar náist í þessari viku.“
Ólafur segir samt sem áður að hann sjái nú samt ekki alveg í land í viðræðunum. Kennarar hafa farið fram á 17% launahækkun.
„Við erum að gera samning til lengri tíma og fórum aldrei fram á það að fá þessa launahækkun í einu lagi. Við höfum því alltaf verið tilbúin að ræða þessa hækkun í einhverjum þrepum.“
Ólafur segir að það sé eitt af þeim málum sem sé enn óleyst.
„Við höfum látið launaliðin bíða örlítið og erum nú að semja um aðra hluti eins og miklar kerfisbreytingar og annað í þeim dúr.“
Fundað verður fram á kvöld og síðan aftur í fyrramálið.
