Renault-vélar í vanda í Malasíu

Fjórir bílar með Renault-vélar hættu keppni í Ástralíu vegna vélabilana. Renault trúir því að fyrirtækið sé að ná árangri í átt að meiri áreiðanleika.

Remi Taffin, yfirmaður Formúlu 1 deildar Renault býst þó við vandamálum í Malasíu um helgina. Þar er heitt og rakt og því líklegt að einhverjar vélar muni ofhitna. Nýja kynslóðin, 1,6 lítra V6 vélarnar, þurfa margfalt meiri kælingu en þær gömlu.

Ástæðurnar eru helst túrbínan og rafkerfið. Mikill hiti myndast þegar rafhlöður bílanna hlaða sig og afhlaða.

Lið sem notast við Renault vélar eru Red Bull, Lotus, Toro Rosso og Caterham.

Taffin fullyrðir að það sé bjartara framundan hjá liðum með Renault vélar, þrátt fyrir mikla byrjunarerfiðleika. „Við urðum vör við nokkur vandamál í öllum bílum í Melbourne en við endursköpuðum vandamálin í herminum í Viry,“ sagði Taffin og á þá við alla bíla með Renault vélar.

Hann heldur áfram „flest [vandamál frá Ástralíu] hafa verið löguð en restin verður komin í lag fyrir æfingar á föstudaginn í Sepang.“

„Með túrbínuvél er loftinntöku vélarinnar alltaf stjórnað óháð ytri aðstæðum svo að löngu beinu kaflar brautarinnar munu virkilega reyna á vélina. Sem leiðir til þess að Sepang brautin, mun verða mjög erfið vegna þess að tvisvar á hring mun vélin vera á fullum snúning, með túrbínuna á allt að 100.000 snúningum á mínútu í meira en 10 sekúndur,“ segir Remi Taffin.