"Svaraðu já eða nei"

„Ég veit að ég verð spurð um skuldamál heimilanna hér á eftir, svo ég ætla að tala örstutt um það líka,“ sagði Katrín Jakobsdóttir, mennta- og menningarmálaráðherra og formaður Vinstrihreyfingarinnar – græns framboðs, á hádegisfundi með kennurum Menntaskólans í Reykjavík í gær.

Enginn bar þó upp spurningu varðandi skuldamálin en ráðherra var samt sem áður grillaður af fundargestum, þar sem hún var meðal annars krafin svara um nýlega breytingu ríkisstjórnarinnar á lyfjalögum.

„Svaraðu já eða nei. Viljið þið kenna ykkur við svona aðgerðir?“ spurði einn kennarinn Katrínu, sem gat ekki svarað eins og um var beðið. Var þá spurningin ítrekuð en svar ráðherra var loks að eðlilegt væri að endurskoða kerfið ef kjör sjúklinga skerðast. Flokkurinn var einnig gagnrýndur harðlega fyrir linkind í umhverfismálum, fáar aðgerðir í samgöngumálum og hægagang í lagabreytingum varðandi jafnrétti foreldra.

„Nú leggur VG áherslu á umhverfisvernd. Hvernig gat það gerst að þið samþykktuð Bjarnarflag?“ spurði Kolbrún Elfa Sigurðardóttir meðal annars.

Það sem stóð þó hæst voru vitanlega menntamálin, þá sér í lagi bág fjárhagsstaða MR og laun framhaldsskólakennara almennt.

„MR er illa settur skóli. Við erum með ódýrustu nemendurna ár eftir ár og fáum langminnst framlög,“ sagði Guðjón Ragnar Jónasson íslenskukennari. „Á ég að dæmast fyrir að búa í 101 í stað þess að vera austan Snorrabrautar? Á skólinn minn ekki að njóta sömu réttinda og aðrir skólar?“

Eins og bent var á eru þetta ekki spurningar sem menntamálaráðherra var að heyra í fyrsta sinn, en þeir fundargestir sem þurftu ekki að rjúka til kennslu eftir að fulltrúar VG fóru af svæðinu voru allir á einu máli um að ekki hefði nóg verið að gert á síðasta kjörtímabili fyrir menntakerfið í landinu.

„Menntamálin eru alltaf með í öllum hátíðarræðum, en þegar kemur til framkvæmda gerist ekkert,“ sagði Þyrí Árnadóttir áður en hún hélt aftur til vinnu.

Mér finnst hún vera í mikilli vörn

„Svona fundir virka vel. Maður kemst sjaldnast annars í návígi við frambjóðandann en þetta er auðvitað óvenjulegt í dag þar sem menntamálaráðherra talar í þessari stofnun,“ segir Trausti Þorgeirsson, tölvunarfræði- og stærðfræði­kennari við MR, að loknum fundi. „Svo finnst mér gott að hafa skemmtiefni á matmálstímum.“

Trausti hefur enn ekki gert upp hug sinn varðandi komandi kosningar.

„Svona heimsóknir hafa klárlega mikil áhrif og geta hjálpað fólki að ákveða sig. Það munar miklu að sjá fólkið í návígi en ekki bara á sjónvarpsskjánum,“ segir hann. Spurður hvort þessi tiltekni fundur hafi haft áhrif á hans pólitísku afstöðu, vill hann lítið svara, en taldi ráðherra hafa verið í varnargír.

„Mér fannst hún vera í mikilli vörn. Flokkurinn mælist með mjög lítið fylgi og ég skil ekki af hverju hún er ekki agressívari og reynir að selja sig betur,“ segir hann.



Það verður verkfall í febrúar

Kennarar kolfelldu samkomulag við ríkið á seinni hluta síðasta árs og starfsmenn MR voru ekki að fela óánægju sína með kjör sín á fundinum. „Við erum að undirbúa verkfall og það er vinna í undirbúningi á vegum stéttarfélagsins,“ sagði Bragi Halldórsson við Katrínu. „Við ætlum í verkfall og ætlum ekki að vinna eftir þessari námskrá.“

Katrín sagðist sjálf hafa mundu tekið samkomulaginu sem ríkið bauð fram væri hún kennari, en skildi aðstöðu stéttarinnar og svaraði gagnrýnisröddunum eftir bestu getu.

Kolbrún Elfa Sigurðardóttir tók undir með kollega sínum. „Það verður verkfall í febrúar. Það verður langt og það verður strangt,“ sagði hún. Eftir fundinn spjallaði blaðakona við nokkra kennara, sem allir tóku í sama streng. Allir sammæltust um að menntamálin hefðu orðið út undan í kosningabaráttunni undanfarið.