Leikskólanum 101 lokað tímabundið

Skóla- og frístundasvið Reykjavíkurborgar sendi nú í þessu frá sér fréttatilkynningu þar sem segir að Leikskólanum 101 hafi verið lokað tímabundið á meðan á rannsókn Barnaverndar Reykjavíkur á meintu harðræði starfsfólks við börn stendur yfir. Þar segir einnig að ákvörðun um að loka skólanum hafi verið tekin af stjórnendum skólans og að skóla- og frístundasvið Reykjavíkurborgar hafi málið til skoðunar. 

„Skóla- og frístundasvið Reykjavíkurborgar, svo og Heilbrigðiseftirlit Reykjavikur, sinna lögbundnu eftirliti með sjálfstætt starfandi leikskólum í borginni. Við reglubundið eftirlit í Leikskólanum 101 á þessu ári hafa engar athugasemdir verið gerðar við aðbúnað barnanna. Foreldrakönnun sem gerð var á vegum sviðsins meðal forsjármanna barna í leikskólanum í vor gaf heldur ekki ástæðu til að athugasemda eða frekara eftirlits.

Skóla- og frístundasvið mun í samstarfi við forsjármenn barna í Leikskólanum 101 boða til fundar þar sem farið verður yfir tilefni rannsóknarinnar og leiðir til úrbóta. 

Foreldrar eða forsjármenn sem eiga eða hafa átt barn í leikskólanum geta leitað til Þjónustumiðstöðvar Vesturbæjar eða Barnaverndar Reykjavíkur vilji þeir koma á framfæri athugasemdum eða telji sig þurfa á sérfræðiaðstoð að halda,“ segir í tilkynningunni.