Hlynur Atli búinn að undirbúa fagn gegn Fram

„Þetta verður sérstakt. Ég er búinn að bíða eftir þessu lengi. Það er meiri spenna en fyrir venjulegan leik," segir Þórsarinn Hlynur Atli Magnússon.

Fram tekur á móti Þór í 7. umferð Pepsi-deild karla klukkan 17 í dag. Hlynur er uppalinn Framari en söðlaði um í vetur. Hlynur segir að það verði gaman að hitta gömlu félagana og fara á gamla heimavöllinn.

Hlynur yfirgaf Fram í fússi í vetur. Hann er þó ekki með hugann við það.

„Nei, alls ekki. Ég er kominn í nýjan klúbb og mér líður vel. Það voru vissulega hvorki kossar né faðmlög en það er gleymt og grafið núna."

Hlynur á eftir að opna markareikning sinn í sumar. Skyldi hann vera búinn að undirbúa fagn ef svo færi að hann skoraði gegn gömlu félögunum?

„Þegar ég skora á eftir? Ég er búinn að hugsa fagnið. Það er klárt," sagði Hlynur léttur.

Beina textalýsingu úr Laugardalnum má nálgast hér.