Enn veiða Drangsnesingar í Bjarnarfjarðará

Allir sem áttu lögheimili í Kaldraneshreppi 1. maí fá úthlutað veiðidegi í sjóbleikjuánni Bjarnarfjarðará. Undir jarðir sveitarfélagins heyrir um fjórðungur veiðiréttarins í  ánni..

Aðrir veiðidagar en þeir sem Kaldraneshreppur ræður yfir eru á forræði nokkurra jarðeiganda við Bjarnarfjarðará.

Fremur flókið hefur verið fyrir utanaðkomandi að komast til veiða í þessari sjóbleikjuparadís frá því veiðifélag árinnar samþykkti að hætta útleigu hennar og skipta dögunum milli eigendanna sem hver ráðstafar sínum leyfum. Veitt er á fjórar stangir í ánni en enginn á fleiri en tvær stangir í einu.

Sumarið sem nú gengur í hönd er það sjöunda í röð sem Kaldraneshreppur skiptir sínum leyfum milli heimamanna sem flestir búa á Drangsnesi. Ánægja mun vera hjá mörgum íbúanna með þetta fyrirkomulag sem er að festa sig í sessi.

Veitt er í Bjarnarfjarðará frá 20. júní til 30.september.