Veiðin fer ágætlega af stað í Hlíðarvatni

Hlíðarvatn í Selvogi er eitt af bestu silungsvötnum landsins og hefur verið eftirsótt af veiðimönnum í fjöldamörg ár.

Veiðin í vatninu frá opnun hefur verið ágæt en dæmi eru um að veiðimenn séu með allt að 10 bleikjur eftir daginn.  Fyrir nokkrum árum síðan var erfitt að komast að í vatninu nema bóka með góðum fyrirvara og eins vera í einhverju af þeim félögum sem eiga leyfi í vatnið.  Það virðist vera aðeins rýmra um veiðimenn í dag og eitthvað af leyfum eru óseld sem opnar á möguleikann fyrir þá sem eiga eftir að prófa þetta skemmtilega vatn að ná sér í leyfi og kynnast Hlíðarvatni.  Yfirlit yfir lausa daga má t.d. finna á www.veida.is og eins og sjá má á listanum eru dagar lausir á víð og dreif í sumar.  Þeir sem veiða mikið í vatninu eru ekki alltaf sammála um hvaða tími sé bestur en frá miðjum maí út júní þykir að jafnaði góður tími.  Bleikjan í vatninu þykir sérstaklega bragðgóð.