Sigmundur Davíð búinn að hitta Árna Pál og Birgittu

Sigmundur Davíð Gunnlaugsson, formaður Framsóknarflokksins, er byrjaður að hitta formenn annarra flokka sem fengu kjörna þingmenn í nýliðnum kosningum.

Þegar Sigmundur Davíð tók við stjórnarmyndunarumboði á Bessastöðum í dag sagðist hann ætla að ræða við formenn allra flokka. Samkvæmt upplýsingum Vísis hefur hann nú þegar rætt við Árna Pál Árnason, formann Samfylkingarinnar, og Birgittu Jónsdóttur, kaptein Pírata.

Þá hefur hann sett sig í samband við forystumenn annarra flokka og mun að öllum líkindum funda með þeim á morgun.