Batt enda á einokun Nadal

Novak Djokovic bauð upp á sýningu í tennis þegar hann lagði Rafael Nadal í úrslitum á Monte Carlo mótinu í tennis. Djokovic vann í tveimur settum 6-2 og 7-6.

Nadal hafði unnið mótið heil átta ár í röð og var fyrir vikið taplaus í heilum 46 leikjum í röð. Nadal lagði Djokovic að velli í úrslitum árið 2009 og 2012 en nú var komið að Serbanum.

Eftir þægilegt fyrsta sett tapaði Djokovic uppgjöfinni í öðru setti. Hann sneri þó við blaðinu og tryggði sér sigurinn í leiknum sem tók tæpar tvær klukkustundir.

Nadal er enn að vinna í formi sínum eftir að hafa verið fjarri tennisvellinum í átta mánuði vegna meiðsla og veikinda. Það var þó ekki hægt að fela sig á bakvið neinar afsakanir því Djokovic fór einfaldlega á kostum.

„Til hamingju Novak, leikur þinn er einstakur. Til hamingju með að hafa unnið uppáhaldsmótið mitt," sagði Nadal í leikslok.