Sleit krossband

Markvörðurinn Árni Freyr Ásgeirsson, sem varið hefur mark Keflvíkinga í Lengjubikarnum undanfarnar vikur, missir af komandi tímabili í efstu deild.

Árni Freyr varð fyrir meiðslum á æfingu liðsins í síðustu viku og nú er ljóst að krossband er slitið. Árni Freyr hafði varið mark Keflvíkinga í fjarveru Ómars Jóhannssonar sem er sjálfur kominn á fulla ferð eftir meiðsli.

Árni Freyr er á 23. aldursári, uppalinn Keflvíkingur og kom við sögu í einum leik liðsins í Pepsi-deildinni síðasta sumar.

Bakverðirnir Grétar Atli Grétarsson og Ray Anthony Jónsson eru byrjaðir að æfa aftur eftir meiðsli. Því eru ágætar líkur á að þeir verði klárir í slaginn þegar Keflvíkingar sækja FH heim í Kaplakrika í 1. umferð Pepsi-deildar sunnudaginn 5. maí.

Eins og greint var frá á Vísi í gær ríkir algjör óvissa um þátttöku Einars Orra Einarssonar, miðjumanns Keflavíkur, í sumar. Einar Orri glímir við brjóskskemmdir í hné og óvíst hvenær hann getur farið að beita sér að fullu.