Kaepernick sækir um einkaleyfi á orðinu "Kaepernicking"

Heitasta stjarnan í NFL-deildinni er hinn ungi leikstjórnandi San Francisco 49ers, Colin Kaepernick. Hann hefur blómstrað í vetur og er kominn með lið sitt í Super Bowl.

Leikstjórnandinn, sem er á öðru ári í deildinni, bauð upp á einu bestu frammistöðu í sögu deildarinnar er 49ers pakkaði Green Bay saman í úrslitakeppninni.

Eftir það ruku vinsældir leikmannsins upp úr öllu valdi og hann hefur selt langflestar treyjur í deildinni það sem af er þessu ári.

Kaepernick hleypur mikið með boltann og hann er farinn að fagna snertimörkum sínum með því að kyssa á sér upphandlegginn. Reyndar nær hann því ekki alveg þar sem hann spilar með hjálm.

Hvað um það. Blöðin eru farin að kalla fagnið "Kaepernicking" og það er orðið það vinsælasta síðan "Tebowing" sló í gegn. Þá stillti fólk sér upp eins og leikstjórnandinn Tebow og varð algjört Tebowing æði í heiminum.

Kaepernick hefur nú sótt um einkaleyfi á orðinu "Kaepernicking" enda veit hann sem er að það getur gefið vel í vasann.

Þegar er byrjað að framleiða Kaepernicking-boli sem eiga vafalítið eftir að seljast í bílförmum. Eins og vera ber mun stór hluti ágóðans fara í góðgerðarmálefni.