Hamilton á ráspól en Alonso í basli

Verkefni helgarinnar varð mun erfiðara fyrir Fernando Alonso í tímatökunum í dag þegar hann náði aðeins áttunda besta tíma, fjórum sætum á eftir Sebastian Vettel. Þeir Alonso og Vettel berjast um heimsmeistaratitilinn á morgun.

Það var hins vegar Lewis Hamilton á McLaren-bíl sem ók hraðast. Hann mun því ræsa fremstur í sínum síðasta kappakstri fyrir McLaren. Liðsfélagi hans Jenson Button fer annar af stað í kappaksturinn.

Bæði Alonso og Vettel þurftu að láta í minnipokan gagnvart liðsfélögum sínum í tímatökunum. Mark Webber á Red Bull ræsir þriðji á undan Vettel ræsir fjórði. Felipe Massa náði svo fimmta besta tíma á undan Alonso. Þetta er aðeins í annað sinn á árinu sem Massa stendur sig betur en liðsfélagi sinn í tímatökum.

"Ekkert gerðist. Ég var ánægður með hringinn," sagði Alonso spurður hvað hefði gerst í tímatökunum. "Kannski getur rigningin hjálpað. En ég held að við verðum að leggja okkur alla fram til að gera þetta sem skemmtilegast í kappakstrinum á morgun."

"Við vorum hissa á því hversu illa gekk hjá Vettel," sagði Martin Whitmarsh, liðstjóri McLaren, eftir tímatökuna. "Yfirleitt kemur hann manni á óvart með því að rústa besta tímanum okkar. Núna kom hann á óvart á hinn veginn."

Pastor Maldonado á Williams ræsir sjötti á undan Nico Hulkenberg á Force India. Alonso á því erfitt verkefni fyrir höndum. Maldonado gæti reyndar fengið refsingu því hann hlýddi ekki kalli dómara um að koma bílnum í vigtun.

Níundi er Kimi Raikkönen á Lotus og tíundi Nico Rosberg á Mercedes. Liðsfélagi Raikkönen, Romain Grosjean, komst ekki upp úr fyrstu lotu tímatökunnar og ræsir átjándi. Hann lenti í samstuði við Pedro de la Rosa á HRT og bíllinn skemmdist of mikið.

Útlit er fyrir að kappaksturinn á morgun verði gríðarlega skemmtilegur. Veðurfræðingar í Brasilíu spá rigningu um það leiti sem kappaksturinn stendur yfir. Veðrið á því eftir að gera titilslaginn enn skemmtilegri.

Brasilíski kappaksturinn er sýndur í beinni útsendingu á Stöð 2 Sport og hefst útsending klukkan 15:40.

Rásröðin í kappakstrinum á morgun

Nr.	Ökuþór	Bíll / Vél	Tími	Bil
1	Lewis Hamilton	McLaren/Mercedes	1'12.458	-
2	Jenson Button	McLaren/Mercedes	1'12.513	0.055
3	Mark Webber	Red Bull/Renault	1'12.581	0.123
4	Sebastian Vettel	Red Bull/Renault	1'12.760	0.302
5	Felipe Massa	Ferrari	1'12.987	0.529
6	Pastor Maldonado	Williams/Renault	1'13.174	0.716
7	Nico Hülkenberg	Force India/Mercedes	1'13.206	0.748
8	Fernando Alonso	Ferrari	1'13.253	0.795
9	Kimi Räikkönen	Lotus/Renault	1'13.298	0.84
10	Nico Rosberg	Mercedes	1'13.489	1.031
11	Paul Di Resta	Force India/Mercedes	1'14.121	1.663
12	Bruno Senna	Williams/Renault	1'14.219	1.761
13	Sergio Pérez	Sauber/Ferrari	1'14.234	1.776
14	M.Schumacher	Mercedes	1'14.334	1.876
15	Kamui Kobayashi	Sauber/Ferrari	1'14.380	1.922
16	Daniel Ricciardo	Toro Rosso/Ferrari	1'14.574	2.116
17	Jean-Eric Vergne	Toro Rosso/Ferrari	1'14.619	2.161
18	Romain Grosjean	Lotus/Renault	1'16.967	4.509
19	Vitaly Petrov	Caterham/Renault	1'17.073	4.615
20	H.Kovalainen	Caterham/Renault	1'17.086	4.628
21	Timo Glock	Marussia/Cosworth	1'17.508	5.05
22	Charles Pic	Marussia/Cosworth	1'18.104	5.646
23	N.Karthikeyan	HRT/Cosworth	1'19.576	7.118
24	Pedro de la Rosa	HRT/Cosworth	1'19.699	7.241