Ekki náðist að veiða hreindýrakvótann

Ekki náðist að fella þrettán hreindýr af útgefnum veiðikvóta í sumar, en veiðum lauk í gær. Kvótinn var 1.009 dýr. Helsta ástæðan er sú að veiðimenn skiluðu leyfum sínum þar sem þeir höfðu ekki þreytt skotpróf, sem er skilyrði fyrir veiðum. Þetta olli því að mörgum leyfum þurfti að úthluta aftur sem gekk illa.

Í heildina gengu veiðarnar vel en þó þurfti að grípa til þess í meira mæli en áður að opna skörun milli samliggjandi veiðisvæða þar sem dreifing dýranna var að nokkru leyti óhefðbundin.

Hjá Umhverfisstofnun kemur fram að áberandi sé hversu margir veiðimenn koma til veiða um helgar. Margir veiðihópar eru á ferðinni á sama tíma en aðrir dagar eru illa nýttir.

Fyrri hluta tímabilsins var veður gott en veðrið var ekki eins hagstætt á seinni hluta veiðitímans og tafði það veiðar eitthvað.

svavar@frettabladid.is