Pepsimörkin Extra: Stjörnumenn deila sturtuklefanum með kvennaliðinu

Hjörvar Hafliðason ræddi við bræðurna Jóhann og Daníel Laxdal úr liði Stjörnunnar í Garðabæ þar sem þeir fóru yfir ýmsa hluti hjá félaginu. Í þessu innslagi í Pepsimörkunum Extra á Vísi fékk Hjörvar m.a. að skoða búningsklefa Stjörnunnar. En karla – og kvennalið félagsins eru með sameiginlegan sturtuklefa.

Stjörnumenn ætla sér stóra hluti í sumar og leikmenn liðsins setja stefnuna á Íslandsmeistaratitilinn.

Hjörvar fékk innsýn í sektarsjóð Stjörnumanna en leikmenn eru sektaðir fyrir allt á milli himins og jarðar. Þar má nefna að ef menn fá 3 eða lægra fyrir leik sinn í einkunagjöf Fréttablaðsins þarf að greiða sekt. Þeir sem eru „klobbaðir" í reitarbolta á æfingum greiða 250 kr. í sekt og þar er keppt um „Bjössabikarinn."

Þeir sem mæta of seint á æfingu greiða 500 kr. í sekt og 100 kr. fyrir hverja mínútu eftir að æfing hefst. Framherjinn Garðar Jóhannsson skuldar sektarsjóðinum hæstu upphæðina og bræðurnir útskýra það í innslaginu sem fylgir þessari frétt.

Fimm leikir fara fram í fimmtu umferð Pepsi-deildar karla í kvöld. Stjarnan mætir toppliði Skagamanna á gervigrasvellinum í Garðabæ og hefst leikurinn kl. 19.15. Bæði lið eru taplaus eftir fjórar umferðir og má búast við miklu fjölmenni á Stjörnuvöllinn í Garðabæ.

Hinir fjórir leikir kvöldsins eru: Breiðablik – Fram, Keflavík – ÍBV, Selfoss – Grindavík og Fylkir – Valur. Öllum leikum umferðarinnar verða gerð skil í Pepsi-mörkunum á Stöð 2 sport í kvöld. Þátturinn er í opinn dagskrá og er einnig í beinni útsendingu á Vísi. Útsendingin hefst kl. 22.00.