Anja Pärson leggur skíðin á hilluna

Sænska skíðakonan Anja Pärson hefur lagt skíðin á hilluna. Hún tilkynnti þetta á heimasíðu sinni í dag.

Pärson, sem er 30 ára, vann sex sinnum til verðlauna á Ólympíuleikum á fjórtán ára ferli. Meiðsli hafa sett strik í reikninginn undanfarin ár.

„Alvarleg föll í brekkunum og viðvarandi meiðslavandamál undanfarin ár hafa orðið til þess að frammistaða mín hefur ekki verið eins góð og þarf í baráttunni í hæsta gæðaflokki ," sagði Pärson.

Pärson, sem steig fyrst fram á sjónarsviðið 1998, vann 42 sigra á heimsbikarmótum og varð samanlagður meistari árin 2004 og 2005. Þá vann hún til gullverðlauna á Ólympíuleikunum í Tórínó árið 2006.

„Þetta er erfiðasta ákvörðun sem ég hef þurft að taka á ævi minni. Á sama tíma er ég forvitin og spennt," sagði Pärson um líf utan alpanna.

Nánar um Pärson á heimasíðu hennar. Sjá hér.