Ingibjörg Sólrún segir Össur fara með rangt mál

Ingibjörg Sólrún Gísladóttir, segir það rangt sem Össur Skarphéðinsson utanríkisráðherra hafi sagt í skýrslutöku hjá Rannsóknarnefnd Alþingis og fyrir Landsdómi að hún sjálf hafi bannað honum að kalla Björgvin G. Sigurðsson til fundar um þjóðnýtingu Glitnis í lok september 2008.

Ingibjörg var úti í New York þessa helgi og var með hugann allan við heilsu sína, en hún hafði greinst með æxli í heila þar ytra. Hún var að bíða eftir íslenskum lækni sem myndi úrskurða um það hvort hún ætti að fara í aðgerð vegna æxlisins. Gestur Jónsson hæstaréttarlögmaður hafði hringt í hana og sagt henni að hann vissi að verið væri að ræða málefni Glitnis en að enginn fulltrúi frá Samfylkingunni væri á staðnum.

Ingibjörg Sólrún segist hafa hringt í Geir Haarde fyrrverandi forsætisráðherra sem hafi sagt sér að hún yrði að senda fulltrúa Samfylkingarinnar á staðinn. Henni hafi þá fyrst verið hugsað til Össurar eða Jóhönnu Sigurðardóttur, núverandi forsætisráðherra.

Ingibjörg segir alrangt að hún hafi reynt að halda Björgvin frá fundinum „Ég veit að ég sagði þetta ekki," sagði Ingibjörg í vitnastúku fyrir Landsdómi í dag. „Ég er ekki sá klækjarefur að mér hafi verið efst í huga samsæri gegn viðskiptaráðherra," segir Ingibjörg.

Skýrslutöku yfir Ingibjörgu Sólrúnu er lokið og næstur í vitnastúku er Sigurður Einarsson, fyrrverandi stjórnarformaður Kaupþings.