Geir segist feginn að málflutningi sé lokið

Geir H. Haarde segist feginn að málflutningi í Landsdómi sé lokið. Þetta kom fram þegar hann ávarpaði fréttamenn eftir að mál hans var lagt í dóm.

Geir sagðist fullviss um að hann yrði sýknaður í málinu og bætti við að hann væri saklaus af öllum ákæruliðunum.

Geir sagðist ennfremur bera fullt traust til Landsdóms og bað fólk og fjölmiðla um að gefa dómurum Landsdóms næði til þess að vinna sína vinnu. Þá þakkaði Geir lögmanni sínum, Andra Árnasyni, og fólki hans fyrir góða framgöngu í málinu.