Laxveiðin hafinn í Skotlandi

Laxveiðitímabilið í Skotlandi hófst þann 11. janúar síðastliðinn með opnun Helmsdale árinnar. Hátt í 90 stangir veiddu ána á opnunardaginn án þess að lax veiddist.

Laxveiðin í Skotlandi á síðasta ári var sú mesta frá því að skráningar hófust árið 1952. Til bókar voru færðir 110 þústund stangaveiddir laxar úr skosku veiðiánum, sem er 31% hærri tala en fimm ára meðaltalsveiði. Þetta kemur fram í breska blaðinu Telegraph.

Þarlendir stangaveiðimenn fá hrós frá yfirvöldum sem greina frá því að sjö af hverjum tíu löxum var sleppt aftur lifandi í árnar, þar af var 86% af hinum dýrmæta vorlaxi sleppt.

Það eru hins vegar ekki eingöngu góðar fréttir á ferðinni frá Skotlandi, því á sama tíma og þessar háu tölur eru birtar er fjöldi vorlaxa, sem flokkaðir eru sem stórlaxar, aldrei minni. Er um að ræða einhverja minnstu veiði á vorlaxi í skosku ánum frá því skráningar hófust. Vorlaxinn er talinn mikilvægast hluti þeirra laxa sem hrygna og verja afkomu laxastofna þar í landi.

Ástæður þess að veiðitölur nú eru hærri en undanfarna áratugi eru raktar til þess að hlutur netaveiðimanna undan ströndum landsins fer mjög minnkandi sem aftur skilar stærri göngum inn í árnar. Að auki er talið að veiða/sleppa aðferðin hækki veiðitölurnar þar sem hluti slepptu laxanna veiðist aftur.

Birt með góðfúslegu leyfi SVFR