KR semur við tveggja metra Serba

Körfuboltalið KR hefur breyst talsvert mikið um jólahátíðina. Tveir Kanar sömdu við liðið fyrir skömmu og nú hefur tveggja metra Serbi samið við Íslandsmeistarana.

sá heitir Dejan Sencanski. Hann er væntanlegur til landsins á morgun eða fimmtudag. Hann ætti því að geta spilað bikarleikinn mikilvæga gegn Grindavík á mánudag.

Sencanski er 27 ára gamall og var síðast að spila í Frakklandi. Hægt er að sjá tilþrif með kappanum hér að ofan.

KR var áður búið að semja við Kanana Josh Brown og Rob Ferguson en þeir eru byrjaðir að æfa með KR-ingum. Þeir leysa af þá Ed Horton og David Tairu sem stóðu ekki undir væntingum.