Þorleifur Örn með sýningu ársins í Þýskalandi, Austurríki og Sviss

Uppsetning Þorleifs Arnar Arnarssonar á Pétri Gaut við leikhúsið í Luzern hefur verið valin sýning ársins í hinum þýskumælandi heimi.

Virtasta leikhússíða Þýskalands, Nachtkritik.de, greindi frá valinu í gærkvöld. Á bak við Nachtkritik standa á fimmta tug gagnrýnenda og leikhúsfræðinga víðsvegar um Þýskaland, Austurríki og Sviss. Að valinu á verki ársins kemur þessi stóri hópur sem og áhorfendur.

Tekið var fram að niðurstaðan hlyti að koma á óvart enda sé Luzern venjulega ekki á landakortinu þegar leikhús er annars vegar. „Hvað, frá leikhúsinu í Luzern?, hugsa þeir sem þangað hafa ekki komið. Já, í litlu leikhúsi í lítilli borg í litla Sviss. Þaðan kemur sýning ársins, uppsetning Þorleifs Arnarssonar á Pétri Gaut sem frumsýnd var í Október 2010."

Að uppsetningunni komu ásamt Þorleifi, Vytautas Narbutas sem gerði leikmynd, Filippía Elísdóttir sem gerði búninga og Símon Birgisson sem sá um tónlist og medíu.

„Þorleifur Arnarsson og dramatúrginum Ulf Frötzschner hafa í áhrifamikilli leikgerð komið hinum ógnarstóra heimi Ibsens fyrir innan draumaheims Pétur Gauts sjálfs. Heimur verksins er lifandi og sterk leikmynd Vytautas Narbutas gerir það að verkum að þar geta margir heimar mæst. Kvöldið er hlaðið næmri orku, drífandi krafti og sérstöku ... andrúmslofti," segir einnig í rökstuðningi dómnefndar.

Verkið hlaut góða dóma þegar það var frumsýnt en þá sagði Nachkritik: „Þessi leikandalegi umgangur með verkið býr til rými fyrir tónlist og orðaleiki. Þetta veldur breiðum skala stemminga, allt frá hæðandi kómík yfir í leikhúslega myndbyggingu og loks hjartnæmum andartökum. Þessi kraftmikla uppsetning skilur eftir sig stórar spurningar um sjálfið og tilveruna."