Leikur Cardinals hrundi er Rangers jafnaði metin

Staðan er nú jöfn, 2-2, að loknum fjórða leiknum í World Series-úrslitakeppninni í bandaríska hafnaboltanum í nótt. Texas Rangers vann þá öruggan sigur á St. Louis Cardinals, 4-0.

Óhætt er að segja að leikur Cardinals hafi algerlega hrunið í nótt eftir stórkostlega frammistöðu í þriðja leiknum sem liðið vann, 16-7. Leikmenn Cardinals fóru í gegnum allar níu loturnar án þess að skora eitt einasta stig. Þeim tókst ekki einu sinni að koma sér lengra en í aðra höfn.

Kastarinn Derek Holland hjá Rangers átti frábæran leik og sá til þess að leikmenn Cardinals komust aldrei á flug.

Fimmti leikur liðanna fer fram í nótt og verður sýndur beint á ESPN America, rás 43 á fjölvarpinu.