Hugsanlegt bjórbann hjá hafnaboltaliðunum

Forráðamenn hafnaboltadeildarinnar í Bandaríkjunum íhuga það alvarlega þessa dagana að banna alla bjórdrykkju í félagsheimilum liðanna.

Ástæðan er sú að tveir leikmanna Boston Red Sox hafa viðurkennt að hafa fengið sér bjór þar og tekið með sér á varamannabekk liðsins. Tveir aðrir leikmenn Red Sox eru grunaðir um slíkt hið sama.

Forráðamenn deildarinnar líta málið alvarlegum augum enda vilja þeir eðlilega ekki hafa það að fyrirmyndirnar séu að drekka meðan á leikjum stendur.

Þrettán félög eru með bjór í félagsheimilum sínum þar sem leikmenn hafa greiðan aðgang.