Rangers bara einum sigri frá titlinum

Texas Rangers vann í nótt sinn annan sigur í röð í World Series-úrslitarimmunni í bandaríska hafnaboltanum. Liðið er þar með komið með 3-2 forystu gegn St. Louis Cardinals og þarf bara einn sigur til viðbótar til að landa titlinum.

Leik liðanna í nótt lauk með 4-2 sigri Rangers. Cardinals komst reyndar 2-0 yfir í leiknum en Mike Napoli var hetja Rangers. Hann átti högg í áttundu lotu sem skilaði liðinu tveimur stigum og dugði það til sigurs.

Liðin halda nú til St. Louis þar sem þau mætast aftur aðfaranótt fimmtudags. Rangers dugir einn sigur sem fyrr segir en oddaleikurinn fer einnig fram í St. Louis ef Kardinálarnir ná að knýja hann fram.