Tveimur fyrstu ákæruliðunum vísað frá Landsdómi

Tveimur ákæruliðum gegn Geir H. Haarde, fyrrverandi forsætisráðherra, var vísað frá af Landsdómi í dag.

Um er að ræða tvo fyrstu ákæruliðina. Þeim fyrr segir að Geir hafi „sýnt af sér alvarlega vanrækslu á starfsskyldum sínum sem forsætisráðherra andspænis stórfelldri hættu sem vofði yfir íslenskum fjármálastofnunum og ríkissjóði, hættu sem honum var eða mátti vera kunnugt um og hefði getað brugðist við með því að beita sér fyrir aðgerðum, löggjöf útgáfu almennra stjórnvaldsfyrirmæla eða töku stjórnvaldsákvarðana á grundvelli gildandi laga í því skyni að afstýra fyrirsjáanlegri hættu fyrir heill ríkisins."

Í öðrum ákæruliðnum er Geir sakaður um að hafa „látið undið höfuð leggjast að hafa frumkvæði að því, annaðhvort með eigin aðgerðum eða tillögum um þær til annarra ráðherra, að innan stjórnkerfisins væri unnin heildstæð og fagleg greining á fjárhagslegri áhættu sem ríkið stóð frammi fyrir vegna hættu á fjármálaáfalli."

Eftir standa ákæruliðir sem snúa að meintri ábyrgð Geirs á störfum samráðshóps stjórnvalda um fjármálastöðugleika, ofvexti bankakerfisins og Icesave-reikningum Landsbankans.

Landsdómur féllst ekki á að vísa málinu frá í heild sinni eins og lögmaður Geirs krafðist.

Einn dómaranna í málinu, Ástríður Grímsdóttir, skilaði sérákvæði og vildi vísa öllu málinu frá þar sem hún vildi meina að saksóknari í málinu, Sigríður J. Friðjónsdóttir, væri vanhæf þar sem hún kom að málinu þegar það var enn í meðförum Alþingis.