Ótrúlegt vatnshögg hjá Haas - vann rúmlega 1,3 milljarða kr.

Kylfingurinn Bill Haas fékk heilar 11,5 milljónir bandaríkjadali í verðlaunafé gær þegar hann vann Tour Championship og um leið FedEx-bikarinn. Verðlaunaféð er það hæsta sem keppt er um í golfíþróttinni á ári hverju og vann Haas sér inn um 1,3 milljarða kr.

Haas átti eitt ótrúlegasta vatnshögg sem sést hefur lengi í gær. Boltinn lá þá í grunnu vatni en Haas gerði sér lítið fyrir og negldi boltann á pinna úr vatningu. Myndband af þessu lygilega höggi má sjá hér að ofan.

"Ég var ótrúlega heppinn með leguna. Þetta var í raun eins og sandhögg og það var allt eða ekkert í þessu höggi. Ég veit ekki hvernig ég fór að því að fá spuna á höggið. Ég var mjög heppinn," sagði Haas en hann vann mótið í bráðabana.