Soffía: Erum bestar á landinu

„Við lögðum ansi mikið á okkur og loksins náum við að uppskera eins og við sáðum, þetta er ljúft. Það er fullkomið að ná að landa titlinum á heimavelli,“ sagði sigurreif Soffía Arnþrúður Gunnarsdóttir eftir að hafa landað Íslandsmeistaratitlinum með Stjörnunni í kvöld.

„Við sköpuðum okkur fullt af færum í fyrri hálfleik en náðum ekki að klára þau. Það var smá stress á liðinu og smá taugaveiklun. Við töluðum saman í hálfleik, róuðum taugarnar og kláruðum þetta," sagði Soffía.

„Við spiluðum með þriggja manna vörn í fyrri hálfleik sem mér fannst mjög gaman. Við náðum að pressa á þær en náðum aldrei að klára á síðasta þriðjungnum. Svo kláruðum við þetta í seinni hálfleik. Þetta er svo einfalt, þetta snýst bara um að koma boltanum í netið og við gerðum það,“ sagði Soffía og bætti við:

„Við erum með besta lið á landinu eins og staðan er núna, það er á hreinu,“sagði Soffía en það má sjá allt viðtalið við hana með því að smella hér fyrir ofan.