Djokovic kominn í úrslit á Wimbledon

Serbinn Novak Djokovic er kominn í úrslitaleik í einliðaleik karla á Wimbledon-mótinu í tennis. Djokovic lagði Frakkann Jo-Wilfried Tsonga í fjórum settum 7-6, 6-2, 6-7 og 6-3. Síðar í dag kemur í ljós hver mótherji hans í úrslitum verður þegar Andy Murray og Rafael Nadal mætast.

„Mér hefur sjaldan liðið jafnvel á tennisvellinum. Draumar mínir eru að rætast og vonandi verður ástæða til frekari fagnaðarlát,“ sagði Djokovic að leik loknum.

Tsonga mætti mjög ákveðinn til leiks og hafði yfirhöndina framan af fyrsta setti. Djokovic náði að koma tilbaka og merja sigur í oddalotu. Í öðru setti hafði Djokovic nokkra yfirburði en Tsonga gafst ekki upp. Hann hafði sigur í þriðja settinu eftir oddalotu og hélt sér inni í leiknum. Djokovic sýndi hins vegar sínar bestu hliðar í fjórða settinu og hafði sigur.

Mikil stemmning var meðal áhorfenda á meðan á leiknum stóð enda kapparnir báðir annálaðir skemmtikraftar á tennisvellinum.