Djokovic fékk sér gras á Wimbledon

Serbinn Novak Djokovic fagnaði sigri sínum í úrslitum Wimbledon á sérstakan hátt. Hann bragðaði á grasi vallarins. Erlendir fjölmiðlar hafa fjallað mikið um málið og meðal annars haft samband við næringarfræðinga til þess að fá þeirra skoðun á málinu.

Mér leið eins og dýri. Mig langaði að prófa hvernig grasið væri á bragðið, sagði Serbinn að loknum sigrinum.

Boris Becker sem sigraði á Wimbledon á sínum tíma sagði fögnuð Djokovic einstakan.

„Þetta er ekki það skrýtnasta sem ég hef séð hvað fagnaðarlæti varðar en ég hef þó aldrei séð þetta áður. Ég hef séð sigurvegara kyssa grasið, velta sér á því og stappa niður fótunum en ég hef aldrei séð neinn gera þetta,“ sagði Becker við fjölmiðla.

Þetta var fyrsti sigur Djokovic á Wimbledon-mótinu en sigurinn fleytti honum í fyrsta sæti heimslistans.

„Grasið bragðaðist nokkuð vel í sannleika sagt. Það hefur verið vel séð um það. Þetta var fínt,“ sagði Djokovic.