Haye búinn að reita Klitschko til reiði

Breski hnefaleikakappinn David Haye hefur nánast gert það að lífsstíl að urða yfir Klitschko-bræðurna. Hann hélt áfram og niðurlægði Wladimir Klitschko á blaðamannafundi þeirra fyrir bardagann sem fer fram á laugardag.

Þá sagði Haye að Klitschko væri að vélmenni. Hann væri þess utan fyrirsjáanlegur og kynni ekki að breyta sér. Haye talaði einnig um að hann myndi taka Wladimir af lífi.

"Því miður hefur það gerst í þessari íþrótt að fólk hafi lamast og jafnvel dáið. Það er ekki eitthvað sem á að grínast með," sagði sármóðgaður Klitschko.

Haye hefur komið opinberlega fram í bol þar sem hann hann er að búta niður Klitschko-bræðurna og hann mætti í svipuðum bol í gær þar sem hann sést aflima Wladimir.

"Þessi bardagi verður ein átakanlegasta aftaka sem sést hefur í mörg. Ég ætla að mæta í hringinn og hreinlega slátra honum og það hratt," sagði Haye.

Mikill hiti er á milli Haye og Klitschko-bræðurna og Vitali fór fram á að Haye lofaði að mæta á blaðamannafund eftir bardagann sama hvernig færi. Það var lítið mál hjá Haye sem sagði:

"Ég ætla að spóla í þig eftir bardagann. Það er eins gott að þú farir ekki með bróður þínum í sjúkrabílnum," sagði Haye en þessi ummæli gerðu Wladimir enn reiðari.

Það má því búast við miklum látum er kapparnir mætast um helgina.