Ákæra gegn Geir illa ígrunduð og óskýr að mati verjanda

Verjandi Geirs H. Haarde, fyrrverandi forsætisráðherra, útilokar ekki að reynt verði að fá málinu vísað frá Landsdómi. Hann segir ákæruna gegn Geir illa ígrundaða og óskýra og efast um hvort hægt sé að reka mál fyrir Landsdómi á grundvelli hennar.

Geir Haarde lét hafa eftir sér í hádegisfréttum að sér fyndist furðulegt að það hefði tekið saksóknara Alþingis sjö mánuði að skrifa upp þingsályktunartillöguna nánast orðrétt. Sér þætti með ólíkindum að forseti Landsdóms léti viðgangast að málsmeðferðin hefði tafist um sjö mánuði.

Verjandi Geirs segir orðalag ákærunnar loðið og óskýrt og skorta rökstuðning. Ýmsar setningar í ákærunni megi túlka á marga vegu. Hann telur málið hins vegar þannig vaxið að tilefni sé til að nota ákvæði í lögum sem geri ráð fyrir rökstuðningi í ákærum.

Sigríður Friðjónsdóttir saksóknari Alþingis sagðist ekki telja þörf á því að rökstyðja sakarefnin í ákærunni. Þar fyrir utan teldi hún sig ekki hafa heimild til þess að breyta málatilbúnaði Alþingis en samkvæmt lögum er saksóknari bundinn við þingsályktunina.

Þingfesting verður sjöunda júní og Andri útilokar ekki að reynt verði að fara fram á frávísun málsins.

„Það er auðvitað erfitt að verjast slíkum ákæruatriðum þegar ekki liggur fyrir hvernig menn áttu að haga sér. Það er borðleggjandi að við munum skoða það að krefjast frávísunar, enda er ákæran óljós," segir Andri Árnason, verjandi Geirs.