Hreinn: Við kunnum alveg fótbolta þótt við búum á Akureyri

Hreinn Hringsson aðstoðarþjálfari Þórs var kampakátur með sigur sinna manna gegn Fram. Fyrir leikinn átti hann allt eins von á því að liðið tæki þrjú stig í Laugardalnum.

„Við ákváðum það fyrir sumarið að liggja ekki til baka heldur spila okkar bolta. Við erum með gott lið, við vitum það og kunnum alveg fótbolta þótt við búum á Akureyri. En þetta var sætt í dag."

Hreinn spilaði á sínum tíma undir stjórn Þorvaldar norðan heiða og þekkir vel til vinnubragða hans.

„Við vorum að spila við líklega eitt best skipulagða lið landsins. Toddi er þekktur fyrir það og ég þekki það af eigin reynslu, mjög fær og góður þjálfari þar á ferð, mjög skipulagðir og yfirspiluðu okkur gjörsamlega í seinni hálfleik. Við vorum góðir í fyrri hálfleik, skoruðum þetta mark og vörðum markið í seinni hálfleik."