Hilmar Geir til Keflavíkur

Keflavík hefur fengið góðan liðsstyrk fyrir átök sumarsins í Pepsi-deild karla en Hilmar Geir Eiðsson hefur gert tveggja ára samning við félagið.

Hilmar Geir er 25 ára leikmaður sem kemur frá Haukum sem féll úr Pepsi-deildinni í haust. Hann hefur bæði spilað á miðju og í sókn.

Þá greindi fótbolti.net frá því í gær að Grindvíkingar hafi endurheimt Einar Helga Helgason frá Njarðvík en hann er uppalinn Grindvíkingur sem lék með Njarðvík í 1. deildinni í fyrra.

Fyrr í vikunni samdi Grindavík við tékkneska sóknarmanninn Michal Pospisil til næstu tveggja ára. Sá er 31 árs sem á langan feril að baki. Hann hefur til að mynda leikið með Spörtu Prag í heimalandinu, Hearts í Skotlandi og St. Truiden í Belgíu.

Bæði Grindavík og Keflavík hafa misst sterka leikmenn frá síðustu leiktíð.