Vick skýtur Manning og Brady ref fyrir rass

Hundatemjarinn Michael Vick, leikstjórnandi Philadelphia Eagles í NFL-deildinni, var eitt sinn hataðasti íþróttamaður Bandaríkjanna en það virðist eitthvað vera að breytast.

Aðeins er eitt og hálft ár síðan hann slapp úr fangelsi og nú virðist hann vera orðinn vinsælasti leikmaður NFL-deildarinnar.

Aðdáendur NFL-deildarinnar velja þessa dagana í stjörnulið deildarinnar og hefur Vick fengið flest atkvæði eða tæplega 730 þúsund. Hann er með 39 þúsund fleiri atkvæði en Peyton Manning, leikstjórnandi Indianapolis Colts, sem hefur fengið næstflest atkvæði. Tom Brady er síðan í þriðja sæti.

Vick hefur farið mikinn með Eagles í vetur og virðist vera búinn að finna það form sem hann var í áður en honum var stungið í steininn.

Þangað fór hann fyrir að rækta hunda í hundaat og standa fyrir atinu á sveitabýli sínu.