Ragnheiður skilar gögnum um kostnað

 Ragnheiður Ríkharðsdóttir, þingmaður Sjálfstæðisflokks, skilaði í gær til Ríkisendurskoðunar gögnum um kostnað sinn vegna prófkjörs fyrir alþingiskosningarnar 2007.

Ragnheiði bar ekki skylda til að skila þessum gögnum, en gerði það svo ekki drægi úr trausti til setu hennar í þingnefnd sem á að bregðast við skýrslu rannsóknarnefndar Alþingis.

Samkvæmt bráðabirgðaákvæði í lögum um fjármál stjórnmálasamtaka átti Ríkisendurskoðun að taka við gögnum af þessu tagi fyrir 15. nóvember síðastliðinn og birta þau fyrir áramót. Ríkisendurskoðun er því hætt að taka við þeim.

Lárus Ögmundsson, skrifstofustjóri hjá Ríkisendurskoðun, segir að skoðað verði hvort stofnunin verður við beiðni Ragnheiðar, um að birta gögnin. Hins vegar sé Ragnheiði frjálst að birta þessi gögn upp á eigin spýtur. Stofnunin leggi hvort eð er ekkert mat á þau.

Ragnheiði var í gær boðið að birta gögnin í Fréttablaðinu, en hún sagðist vilja bíða niðurstöðu Ríkisendurskoðunar.

Til upprifjunar má geta þess að þrír borgarfulltrúar Sjálfstæðisflokksins birtu gögn um prófkjörs­kostnað sinn í blaðinu í janúar, en þau voru í svipuðum sporum og Ragnheiður. - kóþ