Besti flokkurinn dalar - Sjálfstæðismenn í sókn

Besti flokkurinn fær sex borgarfulltrúa ef kosningar á morgun verða í samræmi við nýja könnun sem Capacent gerði fyrir RÚV og sagt var frá í sexfréttum.

Þetta er heldur lakari útkoma en flokkurinn fékk í könnun Fréttablaðsins og Stöðvar 2 sem birtist í Fréttablaðinu í morgun en þar fékk flokkurinn sjö menn. Það er Sjálfstæðisflokkurinn sem græðir á fylgistapinu því hann mælist með fimm menn í könnun RÚV en fjóra í könnuninni frá því í morgun.

Í könnun RÚV mælist Samfylkingin með þrjá menn og Vinstri grænir einn, líkt og í könnun Fréttablaðsins og Stöðvar 2.

Þá kemur fram í könnuninni að rúmlega helmingur kjósenda Samfylkingarinnar, VG og Framsóknarflokks í síðustu kosningum ætli sér ekki að kjósa flokkana í þetta skiptið.