Sölvi: Ég er fullur af sjálfstrausti og vil alltaf spila

Sölvi Geir Ottesen verður væntanlega í sviðsljósinu í kvöld þegar íslenska landsliðið mætir Liechtenstein í æfingaleik á Laugardalsvellinum en leikurinn hefst klukkan 19.30. Sölvi Geir er að fara að spila sinn fyrsta landsleik sem leikmaður FCK frá Kaupmannahöfn en hann hefur byrjað vel með dönsku meisturunum á þessu tímabili.

„Við erum ekki búnir að tapa leik, erum á toppnum í dönsku deildinni og erum komnir áfram í næstu umferð í Meistaradeildinni. Þetta byrjar vel hjá okkur. Ég er búinn að fá að spila alla leikina og það er búið að ganga mjög vel til að byrja með," sagði Sölvi fyrir æfingu landsliðsins í gær.

Sölvi hefur verið í byrjunarliðinu í þremur síðustu landsleikjum þar sem Ólafur Jóhannesson hefur getað valið úr öllum leikmönnum.

„Ég er fullur af sjálfstrausti og vil alltaf spila. Maður verður að gera sitt á æfingunum til að sýna sig fyrir þjálfaranum. Ég er búinn að spila síðustu leiki með landsliðinu en ég veit ekki hvaða hugmyndir hann hefur núna," segir Sölvi.

Ísland mætir nú Liechtenstein annað árið í röð í æfingaleik en liðið vann 2-0 í leik liðanna í fyrra.

„Það er ekkert lið sem við getum mætt með hálfum hug. Við þurfum að koma hundrað prósent inn í þennan leik til þess að ná sigri. Ég veit voðalega lítið um lið Liechtenstein en við eigum að vinna þetta lið ef við spilum góðan leik," segir Sölvi.

Íslenska landsliðið er ekki enn búið að fá á sig mark á þessu ári en leikurinn í kvöld er sá fimmti á árinu 2010.

„Það eru ekki bara þeir fjórir öftustu og markmaðurinn sem hafa verið að standa sig vel í varnarleiknum. Allt liðið er að vinna vel saman bæði varnarlega og sóknarlega. Það er vonandi að við höldum áfram þessum sterka varnarleik," segir Sölvi en íslenska landsliðið fékk síðast á sig mark í 1-1 jafntefli á móti Lúxemborg 14. nóvember 2009 eða fyrir 375 spilamínútum síðan.