AGS vill stækka útlánagetu sjóðsins í 1.000 milljarða dollara

Stjórn Alþjóðagjaldeyrissjóðsins (AGS) hefur ákveðið að biðja eigendur sína um að stækka útlánagetu sjóðsins upp í 1.000 milljarða dollara eða rúmlega 122 þúsund milljarða króna.

Alþjóðagjaldeyrissjóðurinn hefur staðið í ströngu síðan að fjármálakreppan skall á fyrir rúmum tveimur árum. Hann aðstoðar nú fjölmörg ríki víða um heiminn þar á meðal Ísland.

Frá ársbyrjun 2009 hefur útlángeta sjóðsins verið þrefölduð og nemur nú 750 milljörðum dollara. Stjórn sjóðsins telur sig þurfa meira fé og vill því auka útlánagetuna upp í 1.000 milljarða dollara.

Samkvæmt frétt um málið á vefsíðunni business.dk verður beiðni sjóðsins tekin til umræðu á næsta fundi G20 landanna í nóvember.

Alþjóðagjaldeyrissjóðurinn fær fjármagn með þrennum hætti. Sjóðurinn fær vexti af lánum sínum til ríkja í vandræðum, fjárframlög frá eigendum sínum sem eru 186 ríki í heiminum og sjóðurinn á einn stærsta gullforða heimsins en hann nemur nú um 3.000 tonnum.

Sjóðurinn hefur þegar sett 400 tonn af gullforða sínum til sölu.