Níu íslenskir sundmenn keppa á HM fatlaðra í sundi

Níu íslenskir sundmenn verða meðal þátttakenda á Heimsmeistaramóti fatlaðra í sundi fer fram í Eindhoven í Hollandi dagana 15. til 21. ágúst. Alls munu 655 sundmenn frá 54 löndum taka þátt í mótinu og keppa um þau verðlaun sem veitt eru hinum ýmsu greinum og fötlunarflokkum en mótið er stærsta sundmót frá upphafi.

Á mótinu keppa allir bestu sundmenn heimsins sem meðal annars tóku þátt í Ólympíumóti fatlaðra í Peking 2008 og Evrópumeistaramóti fatlaðra í sundi sem fram fór hér á landi í októbermánuði 2009.

Níu íslenskir sundmenn verða meðal þátttakenda en af þeim kom fimm úr röðum hreyfihamlaðra og blindra og fjögur úr flokki þroskaheftra. Í sundi fatlaðra er keppt í flokkum S1 - S10 fyrir hreyfihamlaða þar sem S1 táknar mestu fötlun og S10 minnstu fötlun. Flokkar S11 - S13 eru flokkar blindra og sjónskertra og flokkur S14 er flokkur þroskaheftra.

Íslenska hópinn skipa eftirtaldir sundmenn:

Aníta Óska Hrafnsdóttir (S14), Firði

Kolbrún Alda Stefánsdótti (S14), Firði

Sonja Sigurðardóttir (S5), ÍFR

Anna Kristín Jensdóttir (SB5), ÍFR

Hjörtur Már Ingvarsson (S5), ÍFR

Eyþór Þrastarson (S11), ÍFR/KR

Jón Margeir Sverrisson (S14) Ösp/Sunddeild Fjölnis

Ragnar Magnússon (S14), Firði

Pálmi Guðlaugsson (S6), Firði/Sunddeild Fjölnis

Þjálfarar og fararstjórar verða þau Kristín Guðmundsdóttir, Helena Ingimundardóttir, Hjördís Hjartardóttir og Rúnar Arnarsson.

Líkt og á Evrópumeistaramótinu 2009 teflir Ísland fram ungum og efnilegum hópi sundfólks sem miklar vonir eru bundnar við í framtíðinni.

Flestir ofangreindra einstaklinga þreyttu frumraun sína á stórmóti með þátttöku sinni á Evrópumeistaramótinu og til gamans má geta að reynslumestu einstaklingarnir þar voru Eyþór Þrastarson og Sonja Sigurðardóttir sem eru bæði innan við tvítugt. Það verður því spennandi að fylgjast með þessu unga og efnilega sundfólki í keppni meðal þeirra bestu.