Gunnar: Sýndum karakter í lokin

Gunnari Magnússyni, þjálfara HK, var létt eftir leikinn gegn Val í kvöld enda voru strákarnir hans næstum búnir að kasta frá sér öruggum sigri á ævintýralegan hátt.

„Við byrjuðum leikinn frábærlega og það var þessi byrjun sem skóp þennan sigur. Við vissum að þeir kæmu til baka og við slökuðum of mikið á, hleyptum þeim aftur inn í leikinn en sýndum karakter í lokin með því að klára leikinn," sagði Gunnar en HK mátti illa við því að tapa stigum í þessum leik.

„Við áttum tvo erfiða leiki gegn Haukum sem töpuðust báðir. Þá vorum við lélegir. Við vorum því staðráðnir í að koma til baka í kvöld og sýna að við ætlum að vera með í baráttunni. Þetta var lykilleikur en allir leikir eru það núna. Þetta er fyrsti sigur minn í þessu húsi sem er afar ánægjulegt. Það var kominn tími á þennan sigur."