Skýrsla Rannsóknarnefndar frestast um 2 - 3 vikur

Skýrsla Rannsóknarnefndar Alþingis mun ekki birtast fyrr en eftir tvær til þrjár vikur, samkvæmt tilkynningu sem Rannsóknarnefndin sendi frá sér í dag.

Í tilkynningu frá Rannsóknarnefnd Alþingis segir að henni hafi nú borist svör frá þeim 12 einstaklingum sem veittur var kostur á að senda nefndinni athugasemdir. Með bréfum nefndarinnar hafi þessum einstaklingum verið gefinn kostur á að gera skriflega grein fyrir afstöðu sinni til atriða sem nefndin hefði til athugunar að fjalla um í skýrslu sinni á þeim grundvelli að um hefði verið að ræða mistök eða vanrækslu af þeirra hálfu í þeirri merkingu sem þessi hugtök eru notuð í lögum um nefndina.

„Þau svör og fylgigögn sem nefndinni hafa borist eru umfangsmikil eða nær 500 blaðsíður alls. Fyrir nefndinni liggur nú að fara yfir þessi svör og þau gögn sem þeim fylgdu, taka afstöðu til þeirra og ganga endanlega frá skýrslu nefndarinnar til Alþingis. Það er ljóst að þessi lokavinnsla á skýrslunni, frágangur og prentun hennar mun taka nokkurn tíma en áætlanir nefndarinnar miða við að því verði lokið eftir tvær til þrjár vikur," segir í tilkynningunni.

Upphaflega stóð til að skýrslan kæmi út í nóvember, en þá var tilkynnt um að útgáfan myndi frestast til 1. febrúar. Skömmu fyrir 1. febrúar var svo tilkynnt að útgáfan myndi frestast fram í lok febrúar.