Danskur auðmaður í samvinnu við Straum og Stoðir

Danski auðmaðurinn Ole Vagner reynir nú að bjarga félagi sínu Nordicom með aðstoð Straums og Stoða en Nordicom er skráð fasteignafélag í kauphöllinni í Kaupmannahöfn.

Í frétt um málið á business.dk segir að Vagner hafi tekist að útvega 65,5 milljónir danskra kr. og hefur það dugað til að félagið haldi samkomulagi um áframhaldandi viðskipti við banka sína.

Fram kemur að 50 milljónir danskra kr. komi frá hópi sem saman standi af HFI Invest, fjárfestingarfélagi Vagners, og "þrotabúum Straums og Stoða". Vandamálið er að við þessa innspýtingu í Nordicom fer eignarhlutur hópsins yfir 33% í félaginu og þar með hefur skapast yfirtökuskylda. Búið er að sækja um undanþágu á henni til danska fjármálaeftirlitsins.

Fyrir utan þennan hóp hefur norskur fjárfestir lofað að leggja fram 15,5 milljónir danskra kr.

Talsmaður Stoða hafði samband við Fréttastofu vegna þessarar fréttar og vildi koma á framfæri athugasemd. Hann segir ekki rétt að Stoðir sé þrotabú. Í fyrra hafi tekist að ná nauðasamningum við kröfuhafa og séu Stoðir einfaldlega félag í rekstri eftir það.