Vick: Ég er bestur í deildinni

Sjálfstraustið er heldur betur komið aftur hjá hundatemjaranum Michael Vick. Hann hefur farið á kostum með Philadelphia Eagles í vetur og hefur nú viðurkennt að hann telji sig vera besta leikmann deildarinnar.

"Það er erfitt að svara þessari spurningu. Sérstaklega þar sem svarið er að ég myndi velja mig sjálfan," sagði Vick aðspurður um hver væri besti leikmaður deildarinnar í dag.

Þetta er reyndar ekki bara mont af þingeyskum sið í Vick því hann er búinn að vera frábær í vetur og margir spá því að hann verði valinn besti leikmaður deildarinnar. Valið stendur á milli hans og Tom Brady að mati flestra.

Leikstjórnendur fá venjulega þessi verðlaun og hafa unnið 17 sinnum á síðustu 23 árum.